الحرف اليدوية للاطفال
“درجات ولا مهارات؟!”
كم مرة اعتبرت الدرجات والإنجازات الأكاديمية أهم من الفنون والحرف اليدوية؟ طيب ، لو قولتلك أن تربية طفل مبدع وخيالي بيكون أحيانًا أهم من درجاته وشهاداته، وبناءا على النتائج اللي بتقول إن وجود زيادة بنسبة 56٪ في قطاع الوظائف اليدوية والرواتب بحسب مجلة فوربس (2013). اتضح أن القدرة على صناعة منتج نهائي بجودة عالية ممكن تكسب من خلاله أكثر من الحصول على شهادة جامعية.
وفي كمان دراسات أكدت على الجانب الاجتماعي اللي بتطوره صناعة الحرف زي الصداقة والمشاركة والانتماء وأبحاث علم الأعصاب قدمت أدلة بتؤكد إن الفنون والحرف اليدوية ممكن تبقى وسيلة للاسترخاء وبالنسبة للأطفال اللي أعمارهم بين 3 و 8 سنوات بيقول الخبراء إنها أحسن طريقة لمساعدتهم على النمو والتطور
الأطفال بيحبوا جدا ممارسة الفنون والحرف اليدوية ومهم بالنسبة لهم ممارستها في المدرسة والبيت بس للأسف معظمنا بقى يستسهل وبقى كل تسليتهم الموبايل و التابلت اللي طبعا بتأثر عليهم بالسلب أكتر ما بتفيدهم .. وعشان كدة ممارسة الفنون اليدوية هي أكتر حاجة مفيدة ليهم و بتساعدهم يطوروا من مهارتهم.
ودول عشر فوائد تنموية للأطفال من خلال ممارسة الحرف و الفنون اليدوية
بتعزز احترام الذات
ممارسة الفنون و الحرف بتخلق احساس بالإنجاز جوة الطفل وبتعزز احترامهم لذاتهم .. و تعليمهم انهم يصنعوا حاجة بإيدهم بتحسسهم إنهم مسيطرين و بالتالي دة بيبني عندهم ثقة في نفسهم
من خلال الحرف اليدوية ممكن للأطفال إنهم يتعلموا الصبر
ودة لأن المشاريع اللي بتحتاج إنهم يستنوا حاجة تجف بتعلمهم الانتظار. والأحلى هو أن الانتظار يستحق كل التعب دة وبيحسس أطفالك بالرضا عن النتيجة النهائية لكل جهودهم.
الحرف بتعلم المرونة في الحياة
على عكس الرياضيات اللي بيتعلموا فيها إن واحد زائد واحد يساوي اتنين ، فامفيش حاجة اسمها غلط في التعامل مع الحرف اليدوية. الأطفال بيتعلموا أن في أكثر من طريقة للاستفادة من إبداعاتهم ومواهبهم وإن في دايمًا أكثر من إجابة واحدة صح. زي الحياة بالظبط J
ممارسة الحرف بتدرب الأطفال في سن مبكرالتنسيق بين إيديهم الاتنين وعنيهم
ودة هيكون مفيد جدا في حياتهم لما يبدأوا يتعلموا إزاي يربطوا أحذيتهم أو ياكلوا لوحدهم أو مهارات تانية مهمة يستخدموا فيها إيديهم.
بتساعدهم يبقوا اجتماعيين وبتزود الترابط
مخالطة الأطفال ببعض و هم بيصنعوا حاجة بإيديهم بتعلمهم يكونوا صداقات ويتعلموا مهارات اجتماعية ولما كمان الطفل باباه و مامته يشاركوه في اللعب دة بيقوي جدا الروابط اللي ما بينهم
بتشجهم يعبروا عن نفسهم
الفنون بتساعد الأطفال انهم يعبروا عن مشاعرهم وأحاسيسهم بالذات الطفل الإنطوائي وكمان بتخلي كل طاقتهم تطلع في حاجة إيجابية وبتساعدهم يعبروا عن مشاعرهم بوسيلة بصرية صحية جدا.
بتخليهم يمارسوا مهارات حل المشكلات والتفكير النقدي
ودة من خلال إنهم بيواجهوا تحديات ومشاريع مختلفة. ولما بيتمرنوا على حل التحديات البيسطة اللي بتقابلهم في مشاريعهم الفنية هيكتسب ابنك مهارة حل المشكلات.
الفنون والحرف اليدوية ممكن ممارستها في كل مكان
– في البيت ، في الأماكن العامة ، في المدرسة ، في الطريق. زي الكروشيه مثلا ممكن يمارسوه وهم في العربية! وزيادة تعرض الطفل للمهام الإبداعية هتساعد في رفع معدل ذكاؤه.
بتطور مهارتهم الحركية:
معظم الفنون والحرف بتحتاج لحركة اليد والأصابع لما يستخدم الأطفال أصابعهم في اللعب بالمواد الفنية، ودة بيساعدهم يطوروا مهاراتهم الحركية الدقيقة لما يستخدموا عضلاتهم الصغيرة في أيديهم. ودة بيحصل لما يرسموا ويلونوا ويلزقوا ويقطعوا. وكل ما اتطورت مهاراتهم الحركية الدقيقة بشكل أسرع كل ما زاد اللي يقدروا يعملوه لوحدهم وزاد اعتماهم على نفسهم
بتحسن الذاكرة!
بجانب إنهم بيتعلموا أشكال و ألوان جديدة .. بعض الحرف بتتطلب تصور تصاميم ومهارات معقدة وبالتالي دة هيساعدهم في تحسين ذاكرتهم
بس نصيحتنا ليك كأم عشان تخلي أولادك يستفيدوا من ممارسة الحرف و الفنون متخليش الموضوع معقد أوي و إلا هيفقدوا رغبتهم إنهم يمارسوها.
اسمحي لهم بالوقت والمكان وساعتها الأطفال هيكتسبوا مهارة جديدة على حسب سرعتهم الخاصة.
متكونوش متطلبين زيادة عن اللازم وادوهم وقت عشان يتعودوا على الحرفة اللي اختاروها.
خليكم صابرين ومثابرين.
متعزليهمش، وفي نفس الوقت متكتفيش بإنك تسيبلهم الألوان و الأدوات في أيديهم ، عشان تقضي شوية وقت مع نفسك. حاولي تلعبي معاهم وتساعديهم عشان دة هيخلي الموضوع بالنسبالهم ممتع أكتر.
وزي ما شايفين في أسباب كتير أوي تخلي طفلك يمارس الفن والحرف اليدوية التي ممكن جدا تحسن نمو الطفل.مش بس كدة دي كمان طريقة هايلة للآباء إنهم يقضوا وقت ممتع مع أطفالهم وتخليهم يبعدوا عن الشاشات لأن الفنون والحرف طريقة هايلة عشان يقضوا وقت لعب حر.
لو بتدوروا على أفكار فنية وحرفية ممتعة ، ممكن تشوفوا الDIY KIT من اللينك دة
https://gohandy.co/product/dollhouse-do-it-yourself-kit/
المصادر :
